Anong Kulay ng Pag-ibig Ko?
Pula
Hindi, asul
Pero itim ba yun?
Dilaw yata
Pero pula, pula iyon. Sigurado ako.
Pula.
Kulay ng kamisa mo nang sinabi ko sa’yong mahal kita.
Nobyembre noon, naaalala mo?
Nasa jeep tayo, lasing galing sa inuman
Pero ako’y uhaw pa din sa pagmamahal mo.
Tinanong kita:
“Anong naramdaman mo nang sinabi kong gusto kita?”
Sabi mo,
“Ipinagpapasalamat ko.”
Asul.
Binigay ko ang buong puso ko
Nag-a-apoy at nagbabaga para sa’yo
Pero anong isinukli mo?
Yelo.
Wala kang binigay bagaman nararamdaman ko
Ang puso moy nag-a-asul sa lamig ng pagtingin mo.
Itim.
Blangko, walang laman, ni oo ni hindi
Bakante, walang saysay, kaligayahang nag-alisan
Hungkag, walang katuturan, ni pag-asa’y kalaban
Pakiramdam ko ang mundo’y walang katuturan
Dahil lang pag-ibig mo’y di ko makamtan.
Lila.
Ano pa bang gusto mo?
Nagsikap ako para pansinin mo
Nag-aral nang mabuti, nagpapayat, nagpaganda, nagpa-lahat lahat na
Pero pinili mo akong tignan sa kung anong hindi ako
Dahil bilang babae ako sa’yo
Ay ‘di pa sapat.
Pula. Ulit. Sigurado ako.
Kulay ng puso ko, buhay para sa’yo
Kahit iyong tapakan, ibasura, maliitin o laitin
Okay lang, basta ba ang martir na ito’y iyong ibigin
Pula, Asul, Itim, Lila, o kahit ano pang kulay
Pula pa din talaga ang magpapatunay
Na ang pag-ibig ko sa yo’y walang kapantay.
